തിരുവനന്തപുരം: സ്നേഹത്തിന്റെ സ്വന്തം വരകളും വര്‍ണങ്ങളും. ശിവപ്രഭയുടെ ചിത്രങ്ങളെ അങ്ങനെ വിശേഷിപ്പിക്കാം. വി.ജെ.ടി ഹാളില്‍ ഇന്നലെ ആരംഭിച്ച പ്രദര്‍ശനത്തില്‍ ഉള്‍പ്പെടുത്തിയ 45 ചിത്രങ്ങളും ആത്മീയവും ഭൌതികവുമായ കൂടിച്ചേരലിന്റെ കൊടിയടയാളമാണ്. ആന്‍ അണ്‍ഹേര്‍ഡ് മെലഡി, സ്പ്രിംഗ് ഈസ് നോട്ട് ഫാര്‍ ബിഹൈന്‍ഡ്, ബ്ളൂ സ്കൈ ഗ്രീന്‍ ഗ്രാസ് ആന്‍ഡ് ഫ്രണ്ട്സ് ഫോര്‍ എവര്‍, റിഥം ഓഫ് ലൈഫ്, വിസ്പേഴ്സ് ഫ്രം ഹെവന്‍, ദ് പ്രിടെന്‍ഡര്‍, ഫോര്‍ ദ സെയ്ക്ക് ഓഫ് ധര്‍മ, ദ ഡ്രീമര്‍, ലൌ ആന്‍ഡ് ലേബര്‍ എന്നിങ്ങ നെ ഓരോ സൃഷ്ടിയും കലയുടെ മാസ്മരികത ആസ്വാദകനില്‍ അനുഭവഭേദ്യമാക്കുന്നു. സന്തോഷവും സങ്കടവും വിശിഷ്ടാതിഥികളായ ദിനചര്യകളില്‍ തനിക്ക് കരുത്തിന്റെ ഊര്‍ജം പകരുന്ന പ്രിയപ്പെട്ട അമ്മ പ്രഫ. കല്ലട വിജയമ്മ(ആര്‍.എസ്.പി അഖിലേന്ത്യാ ഐക്യമഹിളാസംഘം ദേശീയ പ്രസിഡന്റ്)യ്ക്കാണ് ഈ കലാപ്രദര്‍ശനം സമര്‍പ്പിച്ചിരിക്കുന്നത്. കരമന ഗവ. വിമന്‍സ് പോളിടെക്നിക്കിലെ ഇംഗ്ളീഷ് അധ്യാപികയായ ശിവപ്രഭയെ സംബന്ധിച്ചിടത്തോളം ചിത്രകലയില്‍ അക്കാഡമിക് വിദ്യാഭ്യാസം ലഭിച്ചിട്ടില്ല. കീര്‍ത്തനങ്ങളോ സ്തോത്രങ്ങളോ ശ്രവിച്ചാണ് ചിത്രം വരയ്ക്കാറുള്ളത്. കൂടുതലും സ്ത്രീരൂപങ്ങളാണ്. സ്ത്രീയുടെ ശാരീരികമായ ആകൃതി തന്നെയാണ് അത്തരം സമീപനം സ്വീകരിക്കാന്‍ കാരണം- ശിവപ്രഭ പറയുന്നു. എന്നാല്‍ നര-നാരായണ പോലുള്ള തന്റെ ചിത്രങ്ങളില്‍ പുരുഷരൂപങ്ങളും കടന്നുവരുന്നുണ്ട്. ചിത്രകലയിലെ എല്ലാ മാധ്യമവും പരീക്ഷിച്ചിട്ടുണ്ട്. ജലച്ചായം, എണ്ണച്ചായം, അക്രലിക് എന്നിവയിലെ പരീക്ഷണങ്ങളാണ് പ്രദര്‍ശനത്തില്‍ ഉള്‍പ്പെടുത്തിയിരിക്കുന്നത്. മനസില്‍ പഴമയുടെ മഞ്ചാടിമണികള്‍ ലാളിക്കുന്ന ശിവപ്രഭ സ്നേഹത്തെയാണ് താന്‍ സ്നേഹിക്കുന്നതെന്ന് വിനയത്തോടെ പറഞ്ഞു. അണ്‍ഹേര്‍ഡ് മെലഡീസ് എന്ന ശീര്‍ഷകത്തില്‍ ഇന്നലെ ആരംഭിച്ച പ്രദര്‍ശനം മന്ത്രി എം.എ. ബേബി ഉദ്ഘാടനം ചെയ്തു. പ്രഫ. ടി.ജെ. ചന്ദ്രചൂഡന്‍ അധ്യ ക്ഷനാ യിരു ന്നു. ഒ.എന്‍.വി കുറുപ്പ്, സുഗ തകുമാരി, കാനായി കുഞ്ഞി രാമന്‍, കാട്ടൂര്‍ നാരായണപിള്ള, ബി. സന്ധ്യ എന്നിവര്‍ പ്രസംഗിച്ചു. എക്സിബിഷന്‍ നാളെ സമാപിക്കും. 2005ല്‍ കൊല്ലത്ത് എക്സിബിഷന്‍ നടത്തിയിരുന്നു. കൊല്ലം സ്വദേശിയായ ശിവപ്രഭ ഇപ്പോള്‍ കൈമനത്താണ് താമസം.
